شوفوا الحماه ممكن تعمل ايه في جوز بنتها في شم النسيم

البعض قد يراني متحاملا ولكن شخصيته الحماه التي اصورها انما انقلها دائما عن شخصية حقيقية ولكن مجرد الخطوط الاساسيه وطبعا انا زودت كتير
يوم شم النسيم والاستاذ خالد بيحلم يقضيه في السرير بس من الواضح ان القدر مرتبة حاجه غير كده خالص تعالوا نشوف ايه اللي هيحصله.
الزوجه : يالا يا خالد اصحى بقى يالا انت جايب النوم ده منين
خالد : سيبيني ده فرصه انام كده وانا فارد جسمي بدل ما نايم طول النهار في الشغل على كرسي ولا عارف اتقلب ولا اتمطع ياه
الزوجه : يالا قوم بقه احنا بقينا الضهر يالا علشان ناكل اما انا عملالك حته صينة سمك هتاكل صوابعك وراها
خالد : يا رب كتير عليا كله ده راحه واكل انا متهيألي انا عمري ماحسيت بالسعادة ديه واوعي تكوني زعلانه مني يا حبيبتي علشان مخرجناش اصل الدنيا هتبقه زحمة ومش هنعرف ننبسط
الزوجه : عارفه يا حبيبي وانا ممكن ازعل منك برضه
خالد : ( في سره اما مراتي ديه طيبه بشكل ههههههه خروج هو فيه فلوس علشان نخرج
ه جيب بنطلوني لما بيقى فيه ربع جنيه بحس انه مخليني مايل ناحيته من تقله )
وفجأة يضرب الجرس ويتمتم خالد يا ترى مين اللي جاي دلوقتي تلاقيه المكوجي أما اقوم افتحله )
ويروح يفتح الباب يلاقي حماته في وشه
خالد : يا نهار اسود حماتي قصدي
حماته : نهار اسود علشان شوفتني يا مسخوط ادي اخرتها قال رضينا بالهم والهم مش راضي بينا ، ده انا علشان اعرف ابص في خلقتك واخده تلات حبيات بيرمبران علشان معدتي متقلبش واخده حبيتان انتوسيد علشان الاسهال
خالد : في سره ( ليه هو انتي جيه تزورينا في حمام عمومي) ليه يا حماتي مش قصدي هو انا اقدر برضه وبعدين انتي لسه واقفة على الباب ليه اتفضلي يا حماتي ده انتي اديتي لشم النسيم كده معنى .
حماته وهي داخله تبصله وتقول : اعوذ بالله من الخبث والخبائث
خالد : ايه يا حماتي هو انتي داخله حمام بجد
حماته : ياريت على الاقل الحمام فيه كومبينيشن يضيع الريحه بس فيه ناس لو حتى دلقت عليهم ميه نار ريحتهم هيه هيه
خالد: ليه كده يا حماتي ( ثم يكمل في سره اعوذ بالله من ملافظها )
الزوجه تأتي من الداخل وتفاجأ بوالدتها : ماما حبيبتي ايه المفاجأة الهايلة ديه وحشاني موت
الحماه: والله وانتي اكتر انتي عامله ايه خرجتي النهاردة ولا زي كل سنه الموكوس قضاها نوم .
خالد : ما انتي عارفه يا حماتي الدنيا النهاردة هتبقى زحمة
الحماه : زحمه مستخصر تخرج البنيه يوم واحد تشم في النسيم يا بعيد
خالد : في سره ( يا رب يا شيخه ده يبقى اخر نفس تشميه في حياتك يدخل ما يطلع وساعتها ندر عليا لاحتفل بشم النسيم كل سنه على انه عيد قومي)
الحماه : وبعدين ايه اللي انتى لابسه ده بنطلون مقطع برجل طويله ورجل قصيره ومره شورت وفانله ايه هو انت بتشحت في اوقات فراغك .
خالد : ايه يا حماتي ما كفاية كده بقه
الحماه : والنبي ده منظر افرض حد قابلك في الصاله صدفه يقول عليك ايه ماهيه حاجه من الاتنين ملهمش تالت يا شحات يا اهبل.
خالد :ليه يا حماتي يقابلني صدفه وهو بيتمشى في صالة بيتي ليه هو احنا ساكنين فين ثم يكمل
في سره ( الست ديه شكلها مش هتجيبها لبر يا رب خدها عندك يا كريم انا راضي تدخل الجنه بس يا رب والنبي خدها فوق)
الحماه تبصله من فوق لتحت وتقوله) ويا ترى ديه ريحة الفسيخ ولا ريحة رجلك
خالد : اولا احنا معندناش فسيخ ثانيا مش كفايه كده يا حماتي بقه حرام عليكي حرقتي دمي
الحماه : دمك هو فين الدم ده انتى ناسي لما كنت بتقعد في اوضتك ايام المذاكرة وتقعد تعاكس في مراتك قبل اما تتجوزا المشكله اني ساعتك مافشتك وانا بتشاورلها اللي ضايقني انك كنت بتاعكسها بفنله حمالات بس كانت بحماله واحده ومخرمه من كل حته كأنك مولود بيها والفانله بتكبر معاك يوم بيوم ولا الشورت اللي كنت لابسه ياه كان شكلك عار والمسكله اني كنت لما باشوفك بتصعب عليه .
خالد: ليه يا حماتي ناقص ايد ولا رجل
الحماه:ليه وانت الصادق شكلك الخالق الناطق العيال اللي عندهم العته المغولي
خالد : انا كان شكلي عار عندي عته مغولي ده نص بنات الحته كانوا نفسهم يتجوزوني
الحماه : انهي نص اللي انت بتتكلم عليه ده الناس كانت بتبصلك وبتحمد ربنا وبتدعليك ربنا يقدرك على خلقتك
خالد : حتى خلقه ربنا مش عتقاها
الحماه : ما هي حاجه غريبه ياخي بطني قلبت تاني اليوم اللي بشوفك فيه باخلصلي ولا علبتين من دوا بتاع قلبان المعده.
خالد : بقولك ايه انا سايبلك الاوضه وداخل
الحماه: يالا السكه التي تودي
خالد يدخل جوه واحلام اليوم السعيد كلها انهارت قدامه ووقف قدام المرايه وبص فيها وقعد يصرخ
وهنكمل المره الجايه لو عجبتكوا

شكرا علي الموضوع الجمل اتحفتينا يمنال
و الله ادخلتي الفرحة في قلوبنا